Home » Suugaan » CURDIN-DHADHIYE: Maanso Ka Hadlaysa Bahalnimo Loo Geystay Gabadh 12 Jir Ah!

CURDIN-DHADHIYE: Maanso Ka Hadlaysa Bahalnimo Loo Geystay Gabadh 12 Jir Ah!

Maansadani waxa ay soo baxday 27kii Feberweri 2019ka, waxay ka hadlaysaa gabadh yar oo 12 jir ah, oo kufsi, dil iyo xadgudub loogu geystay magaalada Gaalkacayo, xarunta Gobolka Mudug. Jidhdilka iyo naxariis-darrada dhacday waxa lagu astayn karaa dadqalnimo.

Gabadhaas yar oo la odhan jiray Caasha Ilyaas, waxa ku dhacay xadgudub aanu ka adkaysan karin damiirka nooli. Waxa ay ku baaqaysaa in caddaaladda la horkeeno kuwii bahalnimada ku kacay. Tixdu waxa ay diiradda saaraysaa in la daryeelo haweenka iyo carruurta.

Kufsigu waa tacaddi soo noqnoqday, waxa ay carrabaabaysaa falal foolxun oo hore u dhacay sida:
1. Wiilal kufsi wadareed geystay oo sawirro ka qaaday bilistii ay fara-xumeeyeen, kuwaas oo lagu ciqaabay xukun aad u jilicsan
2. Askari xubinta taranka ka toogtay gabadh uu rabay in uu dhaxal-wareejiyo oo diidday
3. Nin ku eedaysan kufsiga gabadh yar oo Burco ku geeriyootay.

Maansada Curdin-dhadhiye, waxa ay tidhi:

Cawdeedu markay baxdee
Cammuuddiyo iil la dhigay
Waxay ku casuuman tahay
Cawada jannadii Allee
Waxay ka cataabaysaa
Caynkii ifka loogu galay

Dareenka haddaan cabbiro
Waxay tidhi Caasha-yarey
“Carruurtu ma ay mudnayn
Inay carcaraaf martee
Wuxuu canug kaa geyaa
Inaad carbisood hagtood
Asluubta cuddoon bartee

Haddaan curdin-dhadhiyihii
Kuwii cawo-beelka falay
Cadaawe sidaan ahaa
Kuwii i ciqaabay’ee
Caarcaarka naftayda baday
Cadkaygana sii jarjaray
Caddaalad haddaan la marin
Cawaaqib xun baa ku xigi”

Waxay tidhi Caasha-yarey
“Dameer calcalyada dhergaa
Markuu cosob goosto doog
Lammaanaha caacsadee
Sidiisa dad baa cahdigan
U caydhsada maatidoo
Dar baa jira caadhku hago

Cuf iyo tamar maan lahayn
Calyada qurux loo qubiyo
Wuxuu igu caashaqiyo
Calaamado jiita iyo
Ma lihi cambaruud bilnaa
Cimrina qaangaadh ma ihi
Culaysna ma qaadi karin

Caalluhu naxariis darnaa
Markaan cawday een “adeer”
Codsiga “igu daa” ku idhi
Cafiska iimuu tixgelin
Ilmada canka buuxisiyo
Codkaygana wuu bannaaday”

Waxay tidhi Caasha-yarey
“Hooyadu cudud bay u tahay
Caynaanada aadmigee
Caloosha kuwaan sidnow
Marka kale calmashada jacayl
Kuwaan calafkooda guur
Cawayska la loolaynnow
Cuurkaanu walaal nihiyo
Cidla’da wehelkoodiyow
Cakuye aabbaha mar kale
Caleenta la saarayow

Caliimku ragguu xillkiyo
Cayaanka u dhiibay ow
Maxaa caqligiinni helay
Wax ceeb ah inaad dhigtaan
Miyaan laga caagahayn?

Haddaan cilladdaa la dayn
Allaa ka cadhoonayee
Intaad is-canaana taan
Codkiinna ku diida tuu
Cawaanku haddeer ku kacay
Carraabaye duulka nool
Ka jira camalladan gurracan”

Waxay tidhi Caasha-yarey
“Calaacal wax kuuma taro
Cabaadka la faafin iyo
Waxaa cabashadan tiftaa
Dadyahaw celinaaya ficil
Xumaa lagu caabbiyee
Is-kaashada caalamkow

Xishoodku nimaanu celin
Coobbiyo ku muquunsha qori
Ishii Cali waa digniin
Caanyadu wax ku qaadatee
Haddaan xadgudbaha cadkiyo
Cidaamkiisaba la goyn
Ciriqa lama baajin karo”

Waxay tidhi Caasha-yarey
“Halkii cudud xoog leh mudan
Cambaari ma kaafidee
Cabbaysta hubkiinna oo
U ciidama hiilka dumar
Cabsida ha ku joogsadee
Cadaadiya kii shar wada”

Waxay tidhi Caasha-yarey
“Waxaa carrigeenna nool
Intay bilistii cuneen
Kuwii cawrada sawiray
Cadqaate waxaa fasaxay
Caantaynno ku qaata dhagar
Bulshada ceeb baa dul taal

Caruuska midduu galay
Ninkii curaddeedda dilay
U dhaafayna caydigiyo
Midkii yarta ceejiyee
Intuu cararkii firxaday
Dhallaanka la caymadee
Beentana ku caquuqay baa
Burcana ku cabbaaya liin
Dharaar cad miyaad dishaan?”

Waxay tidhi Caasha-yarey
“Nin ciidan ahaa rasaas
Ciqaabta miyuu haween
Cadradda shiish jaan ku deyay
Ku ciil baxay toogasahada

Haddaan casharkaa horiyo
Cibaaradu dheef ku barin
Wallee cudur sii kordhiyo
Caadaysiga oo socdiyo
Inuu dhaco caabaq filo”

Abwaan Saciid Maxamuud Gahayr.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.

%d bloggers like this: